Avocado Brownies - enginn sykur, ekkert hveiti, engar mjólkurvörur!

Eins og ég hef sagt frá áður þá er ég búin að taka út sykur, hveiti og mjólkurvörur. Hljómar hræðilegt, en vá það er sko aldeilis hægt að baka án þess að nota þessi innihöld! Og eins og þið hafið tekið eftir og ég deilt með ykkur að ég eeeelska Avocado! Þar sem ég átti nokkur Avocado sem nauðsynlega þurfti að nota áður en þau skemmdust, hví ekki að baka eitthvað úr þeim? Ég fann þessa æðislegu uppskrift af Avocado Brownies. Enginn sykur, ekkert hveiti, engar mjólkurvörur.... a dream come true! Eina sem mér fannst var að útkoman var meira eins og mús heldur en brownie, hún var mjög mjúk og áferðin silki en mjög bragðgóð. Ég ætla að prufa hafa hana í frysti og sjá hvernig hún kemur út þannig. Kanski í framtíðinni mun ég prufa mig eitthvað áfram með þessa uppskrift, spurning um að bæta við döðlum eða einhverju gúmelaði. En hér kemur uppskriftin sem ég notaði í dag, vona að þið njótið jafn vel og ég.

Avocado Brownies

Innihald:

1/2 bolli dökkt sykurlaust súkkulaði/súkkulaði dropar 

(ég nota dökka súkkulaði dropa sem eru sættir með stevia)

1 msk kókosolía

2 stór avocado

1/2 bolli sykurlaust sýróp (eða önnur sæta)

2-3 msk Xylitol

1/4 bolli hreint kakó

1 msk vanillu dropar

1 msk kókoshveiti 

(ég átti það ekki en tók kókosmjöl og muldi það í kaffikvörn)

3 egg

1/2 tsk matarsódi

1/2 tsk lyftiduft

1/2 tsk salt

Aðferð:

1. Bræðið saman kókosolíu og súkkulaði í örbylgjofni í sirka 30-40 sek, viljum að þetta sé silkimjúkt.

2. Maukið avocado í matvinnsluvél þar til það er silkimjúkt, enga kekki, viljum ekki guacamole ;)

3. Blandið restinni af uppskriftinni saman í matvinnsluvélinni (líka hægt að nota handþeytara).

4. Þegar allt er orðið vel blandað hellið í eldfast mót og bakið í 30-35 mínútur á 180°C. 

5. Eftir bakstur leyfið henni að kólna og geymið svo í kæli í sirka 30 mínútur. 

Verði ykkur að góðu!

Alexandra Sharon

Prótein smákökur "to die for"

Svo virðist vera sem ég er rosa léleg í að setjast fyrir framan tölvuna og skrifa hérna á þessa síðu. En hér er ég! Ekki alveg búin að yfirgefa ykkur. Sumarið hérna í Kanada er búið að vera rosalega gott, búin að kynnast skemmtilegu fólki og skoða aðeins bæina hér í kring og náttúru. Mér finnst rosalega gaman og fallegt að sjá að hérna eru árstíðir, annað en á Íslandi haha. Laufin eru rétt byrjuð að breyta um lit en í næsta mánuði verður haustið alveg komið.

Ég og vinkonur mínar heimsóttum bæinn Elora um daginn.

Hinsvegar þá langar mig að segja ykkur aðeins frá breytingunum sem ég er búin að gera í mataræðinu. Nú er ég búin að taka út sykur, hveiti og mjólkurvörur úr daglegu mataræði. Ég er þó ennþá með nammidag einu sinni í viku en hann mun líklegast breytast bráðum. Ég ákvað að taka þetta úr mataræði mínu bæði vegna þess að ég er með vefjagigt og mig langar að vera heilsuhraust. Sykur er algjört eitur í mínum líkama, hveiti og mjólkurvörur ekkert síðri. Eina sem ég veit um að inniheldur mjólkurprótein í minni daglegri notkun er próteinið sem ég nota, ég prufaði vegan prótein og það var bara svo hræðilega sætt að ég gat ekki borðað það! Maður verður bara að málamiðla :) Mér er búið að líða rosalega vel á þessu mataræði en þetta getur verið erfitt. Ég tók þetta í hænuskrefum í byrjun. Byrjaði á að taka út mjólkina í kaffinu og nota kókosolíu í staðinn, síðan tók ég út ostinn og notaði frekar Daya ost sem kom rosalega skemmtilega á óvart! Næst var það að taka út tortilla pönnukökurnar út og var ég svo rosalega heppin að ég fann tortilla pönnukökur sem eru búnar til úr brúnum hrísgrjónum. Síðan er það sykurinn. Ég hef alltaf verið með sæta tönn, má segja að þetta sé hálfgerð fjölskylduböl þar sem flestir í minni fjölskyldu eru mikið fyrir sætindi haha. Einhvern vegin þurfti ég að finna út hvað ég gæti fengið mér á daginn sem myndi fullnægja þessari sykurlöngun. Borða reglulega hjálpar, drekka nóg af vatni hjálpar... en samt koma þeir dagar þar sem seinni partinn er ég með öskrandi löngun í súkkulaði eða eitthvað sem inniheldur sykur. Ég lagðist í rannsóknar vinnu á internetinu að leita af sykurlausum uppskriftum sem voru líka mjólkur- og hveiti lausar. Rakst ég þá á þessa einföldu og góðu uppskrift af Prótein smákökum, svo kölluðum Protein Brookies þar sem einn helmingurinn er súkkulaðibitakaka og hinn helmingurinn er brownie smákaka. Þær eru búnar að slá í gegn hjá okkur systrum og þvílíkt hvað þær hjálpa til seinni partinn þegar mig langar í kaffisopa og eitthvað sætt með því. Í einni smáköku eru 7 gr protein og 184 kcal. Í upprunalegri uppskrift þá er notast við kókospálma sykur en ég breytti því yfir í Xylitol. Ég er núna búin að baka þessar smákökur 2x. Í fyrra skiptið bakaði ég "brookies" en í seinna skiptið bakaði ég bara brownie smákökurnar. Bæði virkar vel og er algjörlega hægt að ráða þessu hvernig hver og einn vill. Hér fyrir neðan ætla ég að deila gleðinni minni með ykkur.

Protein Brookies

Mynd: http://dailyburn.com

Innihald:

Súkkulaði bita smákökurnar:

1 bolli hnetusmjör eða möndlusmjör - verður að vera fljótandi ekki þurrt

1/2 bolli vanillu prótein 

1/3 bolli Xylitol ( eða eitthvað annað sætuefni )

1 stórt egg

3 msk sykurlausir/mjólkurlausir súkkulaði dropar

Brownie smákökur

1 bolli hnetusmjör eða möndlusmjör - verður að vera fljótandi ekki þurrt

1/2 bolli súkkulaði prótein

2 msk kakóduft

1/3 bolli Xylitol

1 stórt egg

Mynd: http://dailyburn.com

Aðferð:

1. Hitið ofnin í 180°C

2. Takið tvær skálar, í aðra skálina blandið saman súkkulaðibita kökudeiginu og í hina skálina brownie smákökunum. Ef að deigið er of þykkt, fer mjög eftir hnetu/möndlusmjörinu sem er notað, er hægt að bæta við smá vatni, ef að deigið er of þunnt er hægt að bæta við meira af próteini. 

3. Takið eina matskeið af hvoru deigi og rúllið í höndunum og parið saman hlið við hlið á bökunarplötu. 

4. Bakið í ofninum í 10-12 mínútur, látið kólna

5. Til þess að kökurnar verði fullkomnar þá er best að setja þær í ziplock poka og geyma í frystinum. 

Verði ykkur að góðu!

Alexandra Sharon

Sumarið, sól og söngur

Nú er orðið frekar langt síðan ég skrifaði hér inná, sumarið er búið að stela tíma mínum! Búið að vera nóg að gera, ég heimsótti Ísland í júní í 2 1/2 viku sem var yndislegt. Fékk vott af góðu íslensku sumri þá daga sem ég var þar, rigning og rok á köflum. Verð nú eigilega að segja að stundum saknar maður íslenska lofstlagið hérna úti þegar það er orðið alltof heitt og loftið alltof rakt. Svo þegar veturinn kemur þá get ég lofað ykkur því að ég vilji frekar fá sólina aftur! Maður verður bara að minna sig á daglega að njóta hvers dags sem maður hefur, lifa í núinu og vera þakklátur fyrir það sem manni er gefið í lífinu. Hversu erfitt sem það getur stundum verið, þá reyni ég alltaf að horfa á það jákvæða í lífi mínu heldur en að einblína á það neikvæða. Núna um daginn var ég að syngja á tónleikum hérna í Guelph með almennings kór (community choir). Kórinn heitir Cork street chorus og erum við með yndislegan kórstjóra sem kemur frá Írlandi. Kórinn var stofnaður í Janúar og var eigilega tilraun í byrjun. Nú hefur kórinn vaxið vel og fyrstu stóru tónleikarnir okkar voru haldnir 3 júlí síðast liðinn. 

Tekið frá tónleikunum

Þema tónleikana voru lög af "hvíta tjaldinu" og var mikil vinna lögð í þetta verkefni. Við fengum sjálboðaliða sem vildu sjá um að gera allskonar tegundir af poppkorni og óáfenga kokteila fyrir gesti, við fengum kynni, við fengum hljómsveit til að spila með okkur og hljóðmenn. Tónleikarnir fóru fram úr okkar vonum og komu 118 manns til að horfa á okkur syngja, aðgangur var frír en við vorum með styrktarbauka á staðnum fyrir Hope House sem sérhæfir sig í að hjálpa fjölskyldum á götunni. Við náðum að safna yfir 500$! Og aðalmarkmiðið okkar var bara að skemmta okkur og tjá okkur með tónlist, við fengum bónus ofaná það að geta aðstoðað svona frábæru framtaki fyrir heimilislausa. Þetta gladdi hjarta mitt. Ég er búin að kynnast yndislegu fólki í gegnum þennan kór sem ég er svo þakklát fyrir. En þetta er svona aðalega sem er búið að vera að gera hjá mér hérna úti síðan ég kom aftur, um leið og ég fæ einhverjar upptökur frá tónleikunum þá fáið þið auðvitað að sjá líka! 

Cork street Chorus! 

En að öðru, þá var ég að bæta inn í uppskriftirnar. Ég elska Avocado, ég gerði það ekki áður, en núna kann ég virkilega að meta Avocado. Eina sem ég á erfitt með er að borða það hrátt. Þannig ég hef prufað mig áfram og besta útkoman sem mér fannst var að baka það í ofninum. Avocado í smoothie er líka æðislegt, ég mun bráðlega setja inn uppskrift af því. En á meðan, njótið, elskið og lifið! 

Alexandra Sharon

Gott chia í millimál

Gleðilegt sumar!

Voðalega er ég komin með mikin sumarfiðring og farin að hlakka vandræðarlega mikið til að fá sólina og sumarilminn! Hinsvegar hérna í Kanada ákváðu veðurguðirnir að gefa okkur smá skammt af íslensku veðri og sendu smá snjó seint í gærkvöldi, en hann hverfur fljótt, ég hef engar áhyggjur af því. Það eru skemmtilegir mánuðir fram undan hjá mér, Helga vinkona mín kemur í heimsókn um miðjan maí og síðan fer ég til Íslands í tvær vikur í byrjun Júní! Jibbí!

Hinsvegar langar mér að deila með ykkur chia graut sem ég fæ mér stundum sem millimál, ég elska chia! Fullt af omega, andoxunarefnum og trefjum. Hægt er að setja hvað sem manni langar í chia grautinn en uppskriftin hér að neðan er sú sem mér finnst best.

Verði ykkur að góðu!

Langar að skella einni mynd með hérna inn af mér sem tölvufígúru, afþví bara!

Kínverskt app sem slær í gegn hjá mér!

"Ég ætlaði alltaf að verða doktorsritgerð, en ég endaði sem málsháttur" - Nizza háskaegg

Hvað er betra en að  liggja uppi í rúmi, undir sæng og heyra regndropana berja á gluggana og þakið á húsinu? Núna eru hinsvegar þrumur og eldingar! Gerist ekki vorlegra en það hérna í Kanada. Verð nú að viðurkenna að ég verð alltaf smá smeik þegar ég sé eldinguna blossa inn í herbergið mitt og þrumu hljóðið á eftir. En nóg um það mig langar að tala um síðast liðnu daga! Ég trúi því varla að páskarnir séu búnir og liðið er fram á aðra vikuna í Apríl! Þvílíkt hvað tíminn er búinn að líða hratt. Páskarnir hjá okkur voru rosa góðir, einkenndust af góðum mat, söng og íslensku nammi! Mamma sendi okkur þrjú páskaegg - eitt á mann - við ákváðum þó að deila svo að allir fái smakk af öllu. Karamellukurl-, Lakkrís- og Rís páskaegg. Við gátum ekki staðist þess að bíða alveg fram á Páskadag að opna allavega eitt páskaegg, þannig á föstudaginn langa var ráðist á eggin. Þvílík gleði og þvílík sykurvíma! Enn eigum við eggin og munum við líklegast eiga þau alveg nokkra næstu nammidaga! Jamjam! 

Svo alltof girnileg páskaegg!

Síðast liðnar 8 vikur hef ég verið að syngja með í kór á vegum kirkju sem systir mín og maður hennar fara í. Við erum hópur af fólki sem hefur áhuga á söng og er opinn fyrir öllum. Á Föstudaginn langa var loksins okkar fyrsta sýning. Það var svokallað "Stations of the Cross" í kirkjunni og komu saman margir listamenn sem sýndu verk sín í "action" yfir daginn. Ein kona var t.d. að vefa heilt teppi og þangað gat fólk komið með litla miða með bæn sem hún vóf (ég veit ekki alveg hvort ég sé að fara með þetta orð rétt) inn í teppið, aðrir listamenn gröffuðu fyrir utan, aðrir máluðu myndir, spiluðu á hljóðfæri, lásu ritningar og fleira. Þá var það kórinn minn sem söng tvö lög 4x yfir daginn, annað lagið var Down to the river to pray og seinna lagið var Halleluja. En við lagið Halleluja gerðum við svokallað Flashmob og það kom alveg skemmtilega á óvart. Tókst það rosalega vel og eftir á kom fólk upp að okkur alveg snortið, það snortið að ein konan var grátandi sem kom og talaði við mig. Að finna það að við gáfum svona af okkur var alveg æðisleg tilfinning. Ég held að við höfum sko alveg átt þetta páskaegg um kvöldið skilið! :) Fyrir þá sem vilja sjá þá er hægt að smella HÉR til þess að horfa á myndband af flashmobinu.

Systurnar saman á Föstudeginum langa <3

Á Páskadag fórum við til tengdamömmu systur minnar, fengum lambalæri í aðalrétt og íslenskar pönnukökur í eftirrét a la moi. Pönnukökurnar slá alltaf í gegn! En talandi um mat, þá prufuðum ég og Natalja að elda Swahili fisk með hnetusósu sem ég fann á www.cafesigrun.com. Eins og ég hef sagt áður þá er ég algjör gikkur á fisk. En vá, þessi réttur sem við gerðum var rosalega góður og kom svo skemmtilega á óvart! Mér var ekki farið að lítast á blikuna þegar við röðuðum fiskinum í eldfasta mótið, lauknum, tómötunum og síðan MANGÓ yfir! Og í þokkabót var hnetusósa á hellunni til þess að hafa með fiskinum. Svo svakalega skrítin samsetning en virkar alveg fáránlega vel. Ég mæli vel með þessum rétt ef þið viljið prufa einhvern framandi og góðan fiskirétt. En nú er kominn tími fyrir mig að fara að sofa, á meðan þið á Íslandi eruð að rísa úr rekkjum sef ég vært :)

Eigið frábæran dag!

Alexandra Sharon

Vorfögnuður með steikarsúpu

Kasmoon og Sushi elska sólina

Þá eru enn ein veikindin búin að banka uppá hjá okkur á Mountford drive! Nú er það flensan sem hefur stoppað við, smá glaðningur handa okkur rétt fyrir sumarið :) Sem betur fer sendi mamma mér Ísfólkið svo ég hafi nú eitthvað að gera (fyrir utan að Netflix er besti vinur minn). Enn er smá kalt í lofti hjá okkur, en það er byrjað að hlýna aðeins! Grasið er komið fram, snjórinn farinn að kveðja, sólin byrjuð að kíkja við en kalda golan dansar hér enn. Mikið hlakka ég til þess þegar sumarið sýnir andlitið og við segjum bless við kalda veturinn! Kettirnir á heimilinu eru allavega komnir með vorfiðring og væla stanslaust um að fá að fara út á svalirnar. Við Íslendingar elskum sólina og munum aldrei hætta að elska hana! Þegar ég sé sólina skína og heyri fuglana syngja út um gluggann þá kemur íslendingurinn fram í mér, nú verð ég sko að skella mér í sumarkjólinn og fara út að grilla! En um leið og svalahurðin er opnuð, þá rennir maður upp peysunni og bíður eftir næsta sólríka degi sem kemur. Á svona dögum, sérstaklega þar sem ég er með flensuna núna, þá er yndislegt að fá sér góða og bragðmikla súpu. Systir mín eldaði fyrir mig rosalega góða steikarsúpu, sem er svipuð til íslensku kjötsúpunnar, bara aðeins bragðsterkari og meira grænmeti :) Langar mig til að deila þessari súpu með ykkur og vona að þið njótið vel! Nú býð ég spennt eftir páskunum því mamma hefur sent okkur nokkur gúmelaðe íslensk páskaegg! jesss!

Steikarsúpa

12 skammtar

Innihald

800 gr fitulítið steikar kjöt (notaði naut)

1 hvítlauksgeiri

1 laukur

3 sellerý stilkar

3 paprikur (gul, rauð, græn)

2 1/2 L kjöt kraftur

1 bolli rauðvín

1/2 bolli parsley 

1/4 bolli þurrkað timian

1/2 tsk marjoram / Oregano

1/4 tsk red pepper (held það sé eins og chilli krydd/ cayenne pipar)

1 lárviðarlauf

2 stórar kartöflur

2 1/2 bolli saxaðar gulrætur

Aðferð

Steikið kjötið í súpu potti með 1 msk af ólífu olíu í sirka 10 mínútur. Bætið við lauk og hvítlauk og eldið í 5 mínútur í viðbót. Bætið rauðvíninu útí til að þrífa pottinn frá brúnum blettum sem hafa myndast í pottinum. Setjið restina af innihaldinu í pottinn og eldið í 1 klukkutíma. Saltið eftir þörf.

Kraftmikil og góð steikarsúpa!

Þar til næst :)

Alexandra Sharon

Bólgulaust líf með kjúklingarétti mömmu

Síðustu vikur hjá mér eru búnar að vera lærdómsríkar þegar það kemur að mínum eigin líkama. Eins og ég hef sagt frá þá eru ég og systir mín að passa vel upp á mataræðið og hreyfa okkur reglulega. Alltaf á Sunnudögum þá leyfum við okkur svindldag sem inniheldur hveiti, sykur og allt þetta sem fylgir ruslmat. Núna síðasta Mánudag varð ég svo veik í bakinu, daginn eftir svindlið. Það var alveg augljóst að þetta voru áhrif matarins deginum áður. Þar sem ég er að kljást við vefjagigt þá er ég með svakalega mikið af innri bólgum. Með breyttu mataræði hef ég náð að halda þessum bólgum í skefjum, mér byrjaði að líða mikið betur líkamlega og andlega þegar ég fór að huga að mataræðinu 100%. ALLAR bólgurnar sem ég hef haldið í skefjum komu aftur eftir þennan eina svindldag! Þvílíkt hvað mér leið illa, ég var rúmliggjandi allan daginn og leið fáránlega. Það er búið að taka mig næstum heila viku að jafna mig frá þessu. Ég bara vissi ekki að þetta væri hægt! Nú höfum við ákveðið að breyta svindldögunum aðeins, við ætlum ekki að sleppa honum heldur ætlum við að reyna að gera "hollari" útgáfur af því sem okkur langar í. Hveiti, ger og sykur eru alls ekki vinir mínir. 

Mig langar til að deila með ykkur einum kjúklinga ofnrétt sem kemur frá móður minni. Mamma hefur gert þennan rétt alveg frá því við munum eftir okkur, hinsvegar hefur hann alltaf breyst eitthvað yfir árin. Systir mín man eftir Campell súpu í uppskriftinni á meðan ég man bara eftir Matreiðslurjóma (ellefu ára aldursmunur á okkur systrum, mamma hefur eitthvað breytt uppskriftinni eftir árunum). Nú hinsvegar höfum við breytt uppskriftinni aftur! Ég held það sé bara viðeigandi þar sem rétturinn hefur tekið ákveðnum breytingum í gegnum tíðina. Ég vil taka það fram að uppskriftin sem við gerðum er mjög stór, hún entist í 4-5 máltíðir fyrir 3 manns. Uppskriftin hljómar svona:

Kjúklingaofnréttur 

Heill steikur kjúklingur
2 bollar brún hrísgrjón
1 dós Kókosmjólk
1 lítil dós maís baunir
1 rauð paprika
1 stór brokkolí haus
6-7 sveppir (valkvæmt um fjölda sveppa)
Salt og pipar
Rifinn ostur

Aðferð:

1. Rífið niður allann kjúklinginn
2. Skerið niður papriku, sveppi og brokkolí.
3. Setjið soðin hrísgrjón í eldfast mót
4. Bætið við restinni í eldfasta mótið
5. Hellið kókosmjólkinni yfir og blandið öllu saman (getið bætt við smá vatni ef ykkur finnst hann ekki vera með nægan vökva)
6. Saltið og piprið eftir smekk og hrærið vel í
7. Stráið smá rifnum osti yfir
8. Inní ofn á 180°celcius þar til osturinn er gylltur

Langar að borða þetta núna!

Þetta er frábær og einfaldur ofnréttur sem uppfyllir alveg prótein - kolvetni - fitu skalann.

Verði ykkur að góðu og njótið vel! 

Alexandra Sharon

Bolludagsblogg! - viku seinna

Fékk kínverska fortune cookie 

Viku of seint, ég veit. En mig langar samt að segja frá bolludeginum sem við héldum hérna í Kanada fyrir kanadísku fjölskyldu systur minnar! Ástæðan fyrir því að ég sé svo sein í þessum skrifum er að alla síðustu viku er ég búin að vera fárveik. Matareitrun eða einhver hræðilegur vírus sem ég greip, við vitum ekki hvað þetta var, ég er allavega búin með minn skammt af detoxi á þessu ári!! Nóg um það ég er enn á lífi og heilbrigð, fyrsti dagurinn í ræktinni búinn í dag eftir þessa veikinda viku og ég er 10x sterkari! Hversu góð tilfinning það var að komast aftur í ræktina og hrista aðeins á sér rassinn.
     Síðasta Sunnudag ákváðum ég og systir mín að fagna bolludeginum. Við ætluðum sko að vera rosa myndarlegar og baka bollurnar kvöldinu áður svo við þyrftum ekki að stressa okkur í því á Sunnudeginum. Þar sem þetta var í fyrsta skiptið sem við báðar vorum að baka gerdeigsbollur vorum við ekki alveg með hlutina á hreinu í fyrstu. Við fundum einhverja súper auðvelda uppskrift á netinu frá Hússtjórnunarskólanum og hugsuðum að þetta yrði ekkert mál. Eina sem var í þessari uppskrift var hveiti, ger, vatn og MIKIÐ smjörlíki. Þegar ég segi MIKIÐ þá er ég að tala um að deigið var löðrandi í fitu. Eitthvað fannst okkur þetta skrítið en leyfðum við deiginu að taka sinn tíma í að lyfta sér. Svo var komið að því að móta bollurnar og setja þær inní ofn. Enn fannst okkur þetta eitthvað skrítið, deigið var eitthvað svo blautt og slepjulegt. Inní ofn settum við bollurnar og biðum í eftirvæntingum í 10 mínútur (eins og stóð í uppskriftinni) að þær kæmu út fagurgylltar og fullkomlega rúnaðar bollur. Ekki var það alveg. Útúr ofninum komu 15 kexkökur!! Þær höfðu ekki lyft sér og í staðinn voru þær flatar og ljótar. Ekki alveg það sem við vorum að sækjast eftir. Klukkan var orðin nálægt 9 um kvöldið hjá okkur og við í algjöru panikki að finna út hvernig við ættum að redda þessu. Við gátum ekki eyðilagt okkar fyrsta bollukaffi og við búnar að lofa fólki dýrindis rjómabollum! Á endanum ákváðum við að hringja í mömmu, klukkan þá orðin vel í kringum 3 um nóttina á Íslandi, og biðja hana um hennar uppskrift (sem við hefðum átt að gera í byrjun) og auðvitað reddaði mamma okkur! Hún hló bara, gróf upp uppskriftabókina sína og óskaði okkur góðs gengis. Þekkir ábyggilega dætur sínar sem vilja hafa allt fullkomið þegar kemur að svona hlutum.

Aðeins misheppnaðar greyin.

Aftur lögðum við í baksturinn og uppúr miðnætti komu bollurnar fullkomnar úr ofninum! Nú gátum við farið sáttar að sofa. Sunnudagurinn rann upp (Sunday Bunday eins og við köllum þennan dag núna) og við gátum farið að útbúa fyllingarnar og skreyta þessar fínu bollur. Nú er Sunnudagurinn okkar nammidagur þannig við misstum okkur aðeins í gleðinni. Fyllingarnar sem urðu fyrir valinu var karamellurjómi, jarðaberjarjómi, vanillubúðingur, sulta og auðvitað dökkt súkkulaði toppað á bollurnar.

Auðvitað snapchattar maður ferlið!

Nokkuð vel heppnaðar myndi ég nú segja!

Það má segja að þessar bollur slógu í gegn! Fólk át yfir sig eins og venjan er á bolludeginum og margir spurðu hvar það væri hægt að fá svona bollur. Kanski við erum bara komin með business hérna úti! ;) En héðan í frá verður mömmu uppskrift alltaf notuð. Mömmur vita best!

Gleðilegan Bolludag! :)

Alexandra Sharon

Fiskisúpa sem gleður bragðkirtlana

Svona lítur forritið út

Að versla í matinn getur verið mismikil skemmtun. Sérstaklega þegar systir mín dregur mig frammúr á Mánudagsmorgnum (já MÁNUDAGSmorgnum) til að fara að versla í matinn. En ég læt mig hafa það, verð nú að viðurkenna að Mánudagsmorgnar eru einn besti tíminn til að fara að versla í matinn, þ.e.a.s. uppá traffíkina í búðinni að gera og flestar vörur nýjar og ferskar. Við fórum síðasta Mánudagsmorgun að versla í matinn og greip ég mig í að kalla yfir verslunina til systur minnar á Íslensku "Voru það SEX kartöflur?", við það lítur eldri kona á mig með hneykslunarsvip og gengur í burtu. Þá áttaði ég mig á því að ég hafi rétt svo í þessu hrópað "KYNLÍF" yfir alla verslunina. Smá vandræðarlegt augnablik en við hlógum bara af þessu. Hinsvegar langar mig að segja ykkur frá þessu frábæra "appi" sem ég er með í símanum mínum. Þetta er innkaupalista app sem heitir Grocery gadget og er frítt inná App store (hlýtur að vera til á play store líka), það eru til fleiri svipuð öpp en mér fannst þetta líta út fyrir vera einfaldast. Þetta app er búið að létta líf mitt í stórinnkaupum. Já ég er ein af þeim sem er með fullt af öppum sem eru svo "sniðug" en nota þau svo aldrei. En þetta app flokkast ekki undir þau. 

Þegar við skráum niður listann heldur forritið hlutunum áfram og næst þegar við skrifum niður lista þá þarf ekki að skrifa niður allt aftur, heldur bara einfaldlega íta á einn plús. Síðan þegar við förum að versla þá vel ég takkann "shop" og merki svo við þann hlut sem ég er búin að setja í körfuna og í enda verslunarleiðangurins get ég valið "shopping done" og þá fara allir hlutirnir af listanum. Síðan eru líka valmöguleikar á að merkja hluti sem ekki eru til í þetta skiptið þá fara þeir sjálfkrafa á næsta innkaupalista, bara svona svo að ég gleymi þessu alveg pottþétt ekki!

Shopping done!

Sniðuga við þetta forrit líka er að ef einhver annar er með sama forrit þá er hægt að áframsenda innkaupalistann á þann einstakling. 

Nú má einhver versla í matinn fyrir mig!

Ég mæli klárlega með að þið skoðið þetta app ef þið eruð að reyna að taka ykkur á í að vera skipulögð og reyna að nýta vel tímann sem við eigum. Hef komist að því í gegnum tíðina að það eru bara 24 klukkutímar í sólarhring en ekki endalausir klukkutímar eins og ég reikna alltaf með. 

Nóg um matarinnkaupin! Mig langar að deila með ykkur unaðslegri fiskisúpu sem ég og systir mín elduðum í gærkvöldi. Eiginmaður systir minnar gaf þessari súpu fimm stjörnur og "restaurant quality" eins og hann orðaði það. Ég hef alltaf verið svaka mikill gikkur á að borða fisk, en um leið og fiskurinn er kominn í einhvernskonar rétt þá get ég borðað hann. Sannur Íslendingur, er það ekki? ehem... 

Ég fann þessa uppskrift einhvern tíman fyrir löngu á veraldarvefnum og heitir hún Brasilísk fiskisúpa. Vel bragðsterk þessi! Ef hún er aðeins of sterk þá er ekkert mál að milda hana með vatni. 

Ætla ég að deila þessari með ykkur, vonandi gleður þessi uppskrift ykkur!

Brasilísk fiskisúpa

Innihald:

700-900 gr fersk fiskiflök af hvítum fisk (uppskrift segir 1 1/2 - 2 pund)

3 hvítlauksgeirar, maukaðir

4 msk ferskur sítrónusafi eða límónusafi

Salt

Nýmalaður pipar

Ólífu olía

150 ml saxaður blaðlaukur

150 ml saxaður vorlaukur

1/2 rauð paprika, söxuð

1/2 gul paprika, sökuð

1 handfylli spínat

450 ml saxaðir tómatar

1 msk paprika duft

Örlítið af grófum rauðum chili kryddi

1 stórt búnt af ferskum kóríander

1 tsk hrásykur

1 stór dós kókosmjólk

 Aðferð:

1. Leggið fiskiflökin í skál, bætið við maukuðum hvítlauk og sítrónusafa, veltið uppúr svo fiskurinn er vel marineraður. Stráið vel yfir af salti og pipar. Geymið í kæli á meðan restin af súpunni er gerð.

2. Í stórum potti hitið 2 msk af ólífuolíu á miðlungshita. Bætið við blaðlauk og vorlauk og steikið í nokkrar mínútur þangað til hann er orðinn mjúkur. Bætið paprikunni, papriku dufti og rauðu chili kryddi við. Stráið veglega yfir með salti og pipar (minnsta kosti 1 tsk af salti). Eldið í nokkrar mínútur, eða þar til paprikan er orðin mjúk. Bætið síðan við söxuðum tómötum og spínati. Bíðið eftir suðu og eldið í 5 mínútur með engu loki. Bætið að lokum við ferskum kóríander.

3. Notið stóra skeið til að fjarlægja helminginn af grænmetinu (þið munið setja það strax aftur ofaní). Breiðið úr grænmetinu sem eftir er í pottinum þannig það hylji botninn. Næst takið þið fiskinn og leggið hann ofan á grænmetið í pottinum. Kryddið með salti og pipar. Setjið síðan grænmetið sem þið tókuð úr pottinum aftur í, ofaná fiskinn. Hellið kókosmjólk yfir og stráið 1 msk af hrásykri. 

4. Bíðið eftir suðu, lækkið hitann, setjið lok ofan á og látið sjóða í 15 mínútur. Smakkið og bragðbætið eftir þörfum.  

Fiskisúpan braðsterk og góð!

Verði ykkur að góðu! Og endilega þið sem eldið þessa súpu megið segja mér hvað ykkur finnst um hana, líka væri gaman að fá að sjá myndir frá ykkur! :)

Harkan SEX í dag ;)

Alexandra Sharon

Dansað í eldhúsinu

Í gær prufuðum ég og systir mín nýjan rétt í hádeginu. Við gerðum krakkalasagne eftir Berglindi Sigmars. Má finna þennan rétt í Heilsuréttir fjölskyldunnar bók 2 á bls 122. Ástæðan fyrir því að þetta heitir krakkalasagne er afþví grænmetið er svo vel falið í uppskriftinni og þar sem ég get verið svo mikill krakki með grænmeti þá er þetta fullkomið fyrir mig! Við gerðum sósuna frá grunni, þar sem aðal innihaldið var grænmeti, og var útkoman hreint æðisleg! 

Hræra, hræra í sósupott!

Við fundum lasagne plötur sem gerðar eru úr brúnum hrísgrjónum, kom mér á óvart að það var nákvæmlega enginn munur á venjulegum lasagne plötum og þessum hrísgrjónaplötum! Ég vona að ég geti fundið þessar plötur á Íslandi líka. Ef þið vitið hvort það sé hægt að fá svona lasagne plötur á Íslandi þá megið þið endilega láta mig vita hvar ég get keypt þær!

Hrísgrjónapasta for the win!

Eftir þessa máltíð fundum við hvað okkur leið vel og fengum ekki þessa tilfinningu að við höfum borðað einhvern þungann mat. Fengum góða orku sem entist okkur allan daginn. Þessi réttur tók þó langan tíma að gera, heill Todmobile og Páll Óskar geisladiskur til að vera nákvæm. Ekki fannst mér það leiðinlegt, því tónlist og matseld saman er fullkomnun. En út úr þessari uppskrift fengum við heilar þrjár máltíðir fyrir þrjár manneskjur sem sparar okkur vinnu, tíma og pening næst! Ég elska að elda það mikið að ég eigi nóg fyrir að minnsta kosti tvær máltíðir í viðbót. Þá verður allt svo miklu auðveldara næst og ekki hata ég það að ég spari pening í leiðinni. Eins gott að eiga stórann frysti!

Vel stórt lasagne!

Þetta lasagne er klárlega komið í topp 10 sætið mitt yfir uppáhalds matinn minn!

Og þetta lýtur líka svona vel út á disk!

Mig langar líka að fá að troða inn hérna með skipulag á eldhúsi! Núna erum við að taka skipulagið í nefið ég og systir mín, og verð ég bara að segja að skipulag í eldhúsi er númer 1,2 og 3 ef maður vill halda geðheilsunni með allri þessari matseld! Við vorum að taka kryddinn í gegn og fengum við þessar fínu krydd dollur með seglum sem hengt er á vegginn. Ég veit að þetta fæst líka í Ikea og þetta eru ekkert nýja fréttir þessar krydd"hillur" en vá, þetta er fullkomið fyrir skipulagsfríkið! 

Við elskum kryddin!

Alexandra Sharon

Fyrsta tilraun

Séð út um svefnherbergisgluggann

Góða kvöldið internet "sörfarar"

Hér er ég komin með heiðarlega tilraun að stofna bloggsíðu! Þetta verður smá áskorun veit ég, en hver elskar ekki áskorun í byrjun nýtt árs. Þar sem ég er á nýjum stað, með nýjan lífsstíl, á nýju ári ákvað ég að hví ekki skella í eina svona fína bloggsíðu og toppa algjörlega þennan nýja lífsstíl!
 
Það gæti komið vitlaus fallbeyging eða stafsetningarvilla inná milli, ég vona að þið fyrirgefið mér það en ég geri mitt besta að halda mig við rétt íslenskt málfar, með örlítið af slettum hér og þar ;)
     Nú er ég búin að dvelja næstum heilan mánuð í útlandinu góða, nánar tiltekið í bænum Guelph í Kanada. Þessi bær er um það bil 40 mínútna keyrsla frá Toronto í Ontario fylkinu. Um 115.000 manns búa hér og er þetta svokallaður háskólabær. Lítill bær fyrir kanadamenn en fyrir mér ekki svo lítill, þetta er sirka 1/3 af öllu Íslandi! Hér elska menn hokký, allir eiga snjóblásara, drekka Tim hortons og keyra um á "van". En nóg um það. Ég spila ekki hokký, á ekki snjóblásara og drekk ekki Piss hortons.

Bestu grænmetisbuff sem ég hef smakkað!

     Ég og systir mín erum búnar að hafa nóg að gera síðan við komum. Ég þurfti að fá mitt eigið herbergi, auðvitað, og þá tóku við breytingar á heimilinu og þrifnaðar átök. Og þar sem ég og systir mín erum búnar að gera allsherjar hreingerningu í mataræðinu líka þá tekur það svolítinn tíma í að skipuleggja mataráætlanir fyrir vikuna og elda bæði hádegis- og kvöldmat. Við höfum verið að þræða í gegn matreiðslubækurnar Heilsuréttir fjölskyldunnar frá Berglindi Sigmars, bók númer 1 og 2. Ég bara verð að gefa þessum uppskriftabókum mína bestu einkunn! Vá, vá, vá hvað þessi matur smakkast vel! Allt sem við höfum eldað uppúr þessari bók er hrein snilld. Grænmetisréttir, kjúklingaréttir, pottréttir og margt fleira, þvílík gæði í þessum uppskriftum! (ég lofa ég er ekki á prósentu hjá Berglindi í að auglýsa þessar bækur) Það er hellingur eftir sem við eigum eftir að prófa í bókunum og get ég ekki beðið eftir að smakka hina réttina! So far höfum við borðað hreint 6 daga vikunnar og leyft okkur svindldag 7 dag, hvíldardaginn mikla. Ég viðurkenni að þetta tekur tíma, þetta tekur aga og þetta getur verið erfitt! En þetta er svo þess virði, hvernig mér líður í dag og hvernig mér leið fyrir sirka 2 mánuðum er allt annað. Ég er að glíma við vefjagigt og liðagigt, og ég verð bara að segja að mataræði skiptir mig 110% máli, ekki það að ég geti læknað þetta en haldið verkjunum í skefjum skiptir miklu máli.
   En þetta er þó ekki eina sem ég hef verið að gera hér, auðvitað kíkti ég í búðir! ÉG ELSKA WALMART. Já, ég er forfallin walmart verslari. Ég vildi að ég gæti verslað allt þarna og flutt það til Íslands, en ég passa mig nú á að fara ekki yfir línuna ;) Verðin hérna eru bara "too good to be true"! En geymum það þar til næst. Ég vil ekki þreyta ykkur of mikið. Þessi síða er í vinnslu og mun ég reyna að vera eins dugleg og ég get að skrifa hér inn og setja ýmislegt áhugavert inn.

Prinsinn á heimilinu hatar ekki knúsin

Lifðu í lukku en ekki í krukku!

Alexandra Sharon